1,000 bagong Corrections officer sumumpa sa tungkulin

Pinangunahan ni Bureau of Corrections Director General Gregorio Pio P. Catapang Jr. ang sabay-sabay na panunumpa sa tungkulin ng 1,000 na bagong recruit na Corrections Officer 1 (CO1) na ginanap sa National Headquarters sa Muntinlupa City ngayong Miyerkules.

Ang mahalagang kaganapan ay isang bagong yugto ng BuCor para sa paghahanda ng mga officers na magserbisyo sa mga correctional facilities ng bansa.

Sa kabuuang 1,000 recruits, 455 rito ang itatalaga sa New Bilibid Prison at Correctional Institution for Women, 200 sa Davao Prison and Penal Farm, 92 sa Iwahig Prison and Penal Farm, 90 sa Zamboanga Prison and Penal Farm, 80 sa Sablayan Prison and Penal Farm, at 83 naman sa Leyte Prison and Penal Farm. Bawat CO1 ay may katungkulan sa pagpapanatili ng kaayusan at seguridad sa mga naturang institusyon.

Sa kanyang talumpati, binigyang-diin ni Catapang ang kahalagahan ng integridad at mapanuri.

“When you finish your training, do not allow yourselves to be corrupted by persons deprived of liberty,” babala ng BuCor chief.

“Working in Bucor is a sacrifice because you stand up for dignity and discipline,” dugtong nito at inihayag ang mga hakbang sa liderato nito ay para sa reporma ng mga lumang gawi sa loob ng BuCor.

Binanggit din ni Catapang ang dalawang tungkulin ng corrections officers na tiyakin ang seguridad ng PDLs at suportahan ang kanilang rehabilitasyon.

“You need to help PDLs strengthen their lives, but before you can do that, you must straighten your own life first,” ani Catapang.

Para sa ikaaayos ng katayuan ng Bucor personnel, inanunsyo ni Catapang ang bagong inisyatibo sa pabahay sa koordinasyon ng mga ahensiya ng gobyerno gaya ng PAG-IBIG. Hinimok nito ang mga recruits na iprayoridad ang pagkakaroon ng sariling bahay kaysa sa pagkuha ng maraming loan o utang at tiniyak niya na kapag nakumpleto, ang proyektong pabahay ay mag-aalok ng kalidad ng kondisyon ng pamumuhay na makukumpara sa mga eksklusibong komunidad katulad ng Ayala Alabang.

Ibinunyag din nito ang mga planong sasanayin ang mga babaeng trainers upang ang kababaihang recruits ay tatanggap ng patnubay mula sa women officers para pangalagaan ang suportadong kapaligiran para sa lahat.

“Succeed in your training, earn the warmth of life, and improve your service to the nation,” pagtatapos ni Catapang. (Bhelle Gamboa)