P2.9M na halaga ng ilegal na droga nakumpiska sa NCR sa nakalipas na isang linggo
Arestado ang 81 drug offenders at nakumpiska ang ₱2,977,344.00 na halaga ng ilegal na droga sa maigting na anti-illegal drug operations mula sa Hunyo 22 hanggang 28 sa katimugang Metro Manila, iniulat ni Southern Police District (SPD) District Director, BGen Glenn Oliver C. Cinco.
Ayon sa SPD, nasa kabuuang 66 anti-illegal drug operations ang ikinasa sa mga nasasakupang anim na lungsod at isang bayan na nagresulta ng pagkaaresto ng 80 Street-Level Individuals (SLIs) at isang High-Value Individual (HVI). Ang mga tagumpay na ito ay sumasalamin sa agresibo at intelihensiyang mga hakbang ng SPD upang pigilan ang bentahan ng ilegal na droga at kasuhan ang drug personalities.
Sa week-long operations, nakumpiska ng mga operatiba ng SPD ang tinatayang 437.58 gramo ng shabu at 15 gramo ng marijuana.
Bahagi ito sa tuloy-tuloy na paglaban sa ilegal na droga sa pamamagitan ng proactive law enforcement, pinagandang pangangalap ng intelihensiya, at malapit na kolaborasyon sa mga partner na ahensiya at komunidad. Ang ganitong mga inisyatibo ay parte ng pinaigtin na anti-illegal drug campaign ng Philippine National Police na layuning proteksiyunan ang mga komunidad at panatilihin ang peace and order sa Southern Metro Manila.
“Hindi lamang natin sinusukat ang tagumpay sa dami ng naaaresto o halaga ng nakukumpiskang ilegal na droga, kundi sa bawat pamilyang napoprotektahan at bawat komunidad na nagiging mas ligtas. Sa Southern Police District, tuloy-tuloy ang ating kampanya dahil ang layunin natin ay isang ligtas, mapayapa, at drug-free na pamayanan para sa bawat mamamayan,” pahayag ni BGen Cinco.
Naninindigan ang SPD sa pagpapanatili ng kanyang maigting na anti-illegal drug operations at hinimok ang publiko na patuloy na suportahan ang hakbang sa pagpapatupad ng batas sa pamamagitan ng pagsumbong ng mga ilegal na aktibidad sa droga.Sa malakas na pagtutulungan sa komunidad at agarang aksyon ng otoridad,matibay ang pangako ng SPD sa misyon nitong pagtataguyod ng kapayapaan, kaayusan, at kaligtasan ng publiko sa mga nasasakupang lugar. (Bhelle Gamboa)
