2 trabahador nasawi sa pagguho ng hukay sa ginagawang tubo ng Maynilad sa Las Piñas

Patay ang dalawang trabahador habang limang iba pa ang nakaligtas sa 18-metrong lalim na gumuhong hukay ng Maynilad water pipeline project na matatagpuan sa Aquarius Street, Pamplona Park Village, Barangay Pamplona Dos, Las Piñas City nitong Hunyo 28 dakong alas-2:30 ng hapon.

Ayon sa inisyal na report ng Las Piñas City Police Station, unang nasagip ng rescue teams ang tatlong nakaligtas na construction workers kabilang ang isang sugatan na agad dinala sa ospital.

Sa ikinasang search and retrieval operation ng otoridad, dalawang trabahador na unang napaulat na natrap sa guho ang nakuhang wala ng buhay sa hukay kaninang alas-6:30 ng umaga ngayong Lunes.

Pansamantalang ipinasara ang hukay sa lugar kasabay ng pagtigil ng excavation work upang bigyang daan ang masusing imbestigasyon sa insidente.

Kinumpirma naman ng Maynilad ang suspensiyon ng paghuhukay sa lugar dahil sa pangyayari.Patuloy ang malapit na pakikipag-ugnayan nito sa Bureau of Fire Protection ng Las Piñas City, lokal na lokal na disaster response unit at nakakasakop na barangay.

Lumilitaw na dalawang Pilipinong trabahador ang namatay hindi umano dalawang Chinese nationals.

Bunga ng insidente, apektado ang water services sa naturang lugar na konektado sa nasabing pipeline. (Bhelle Gamboa)