Higit 10,000 OFWs, dependents, at stranded Pinoy mula Middle East, nakauwi na sa bansa
Nagpapatuloy ang agarang aksyon ng pamahalaan para sa kaligtasan ng overseas Filipino workers (OFWs) at kanilang mga pamilya mula sa Middle East.
Sa pinakahuling datos nitong June 17, 2026, mayroong 10,446 OFWs, dependents, at stranded Filipinos ang nakabalik sa Pilipinas sa pamamagitan ng repatriation efforts ng Department of Migrant Workers (DMW), Overseas Workers Welfare Administration (OWWA), at iba’t ibang ahensiya ng gobiyerno sa ilalim ng “One Country Team.”
Sa kabuuang bilang, 8,281 ang OFWs, 1,803 ang kanilang dependents, habang 362 naman ang stranded Pinoy na natulungan ng pamahalaan. Kasabay nito, 35,321 ang nabigyan ng financial assistance at iba pang agarang tulong, alinsunod sa direktiba ni Pangulong Ferdinand R. Marcos, Jr.
Batay naman sa datos nitong June 16, 2026, naipagkaloob din ng DMW at OWWA ang sumusunod na onsite services para sa mga apektadong Pilipino:
• 24,588 – food assistance
• 7,708 – transport assistance
• 2,502 – shelter assistance
• 2,460 – medical assistance
Sa kabuuan, 72,579 onsite services ang naihatid ng gobyerno para sa OFWs at kanilang mga pamilya.
Mas pinalakas at pinalawig pa ng DMW at OWWA ang kanilang repatriation, welfare, at reintegration programs upang matiyak na walang maiiwang Pinoy sa oras ng krisis at may katuwang sila sa kanilang muling pagbangon. (Bhelle Gamboa)
