₱768K halaga ng marijuana nasabat sa Makati

Napasakamay ng Southern Police District (SPD) ang isang High-Value Individual (HVI) at nakumpiska ang tinatayang ₱768,000 na halaga ng ilegal na droga sa isinagawang buy-bust operation sa Makati City.

Kinilala ni SPD District Director BGen Glenn Oliver ang naarestong mga suspek na si alyas “Jon,” 21-anyos, tinaguriang High-Value Individual (HVI), at alyas “Aneng,” 18-anyos.

Dakong alas-12:30 ng madaling araw ngayong Huwebes ikinasa ang operasyon ng mga tauhan ng Station Drug Enforcement Unit (SDEU) ng Makati City Police Station sa JP Rizal Street, Barangay Tejeros sa lungsod.

Aabot sa 500 na gramo ng hinihinalang marijuana (kush), anim na marijuana vape devices na naglalaman ng umano’y marijuana resin o oil, buy-bust money, digital weighing scale, cellphone, at iba pang ebidensiya na pinaniniwalaang konektado sa mga ilegal na aktibidad sa droga ng mga suspek.

Nasa kustodiya ng pulisya ang dalawang suspek at sasampahan ng kasong paglabag sa Comprehensive Dangerous Drugs Act of 2002 sa Makati City Prosecutor’s Office.

“Patuloy nating paiigtingin ang ating intelligence-driven at law enforcement operations upang matiyak na mananatiling ligtas at payapa ang ating mga komunidad. Kasama ang ating mga mamamayan, mananatili tayong matatag sa pagsusulong ng isang lipunang malaya sa epekto ng iligal na droga,” sabi ni BGen Cinco. (Bhelle Gamboa)