803 pang PDLs pinalaya ng BuCor

Sumasalamin sa diwa ng kalayaan at katarungan, nagpalayang muli ang Bureau of Corrections (BuCor) ng 803 pang Persons Deprived of Liberty (PDLs) sa pagitan ng Mayo 13 hanggang Hunyo 11 kung saan 11 PDLs ang personal na dumalo sa culminating activity sa BuCor Headquarters sa Muntinlupa City.

Ang aktibidad na ito ay parte ng BuCor sa paggunita ng ika-128 na Araw ng Kalayaan bukas.

Inihayag ni BuCor Director General Gregorio Pio P. Catapang Jr. na simula nang umupo sa puwesto si Pangulong Ferdinand Marcos Jr. umabot na sa kabuuang 32,388 PDLs ang lumaya na naayon sa batas, na mahalagang pagtuon ng administrasyon sa patas at makataong pagtrato sa inmates.

Lumaya ang 803 PDLs sa iba’t ibang pamamaraan kabilang ang 95 na naabsuwelto, 13 na nabigyan ng probation, 176 na individuwal ang nakakuha ng parole, 53 PDLs sa habeas corpus, 464 na indibiduwal ang nakakumpleto ng kanilang sentensiya at dalawang iba pa sa ilalim ng ibang legal na kategorya.

Ayon kay Catapang ang paglaya ng naturang bilang ng PDLs ay hindi lamang nagpagaan sa overcrowding kundi sumisimbolo rin ng pag-asa at panunumbalik ng mga oportunidad.

“As the nation marks its independence, documents of another 40 PDLs have been signed for their release. The freedom given to these individuals reflects the country’s core values of liberty, justice, and compassion,” sabi ng BuCor chief.

“Walang forever sa kulungan pero may second chances sa buhay,” wika ni Catapang sa PDLs, kung saan ang kalayaan ng mga ito ay testamento sa mga proseso ng justice system at kasalukuyang mga reporma sa corrections system.

Nabatid na si Justice Secretary Fredderick A. Vida, na panauhing pandangal sa aktibidad ay naging kinatawan nito si Undersecretary Deo Marco.

Dumalo rin sa kaganapan sina dating Secretary at ngayo’y President of the Muslim Association of the Philippines (MAPI), Almarin Tillah, Al Haj; Attorneys Ronald Macorol at Atty. DEmiteer Huerta, ng Public Attorney’s Office, Engr. Elmer Docusin , Supervising Labor and Employment Officer mula sa Department of Labor and Employment at Mary Jane Novencido, Supervising Probation and Parole Office ng Parole and Probation Administration.

Samantala kinumpirma ni Catapang ang promosyon ng civilian personnel na si Engr. Al Cir Rañosa sa posisyong Supervising Administrative Officer sa ilalim ng General Services Division. (Bhelle Gamboa)