Higit P43M na halaga ng ilegal na dorga itinago sa mga laruan at sandals, nakumpiska ng BOC

Nakumpiska ng mga tauhan ng Bureau of Customs–Ninoy Aquino International Airport ang walong abandonadong parcel na naglalaman ng hinihinalang ilegal na droga na nagkakahalaga ng 43.76 million pesos.

Nadiskubre ang mga ito sa ikinasang interdiction operation sa Central Mail Exchange Center sa Pasay City.

Ang mga kontrabando na kinabibilangan ng iba’t ibang uri ng ilegal na gamot ay itinago sa iba’t ibang produkto at gamit gaya ng mga laruan, bag, pagkain at sandals.

Nagmula ang mga parcel sa Mexico, Canada, India, United Kingdom, Thailand, Malaysia, at Belgium at ipapadala dapat sa iba’t ibang bahagi ng Pilipinas.

Isusumite ang mga nakumpiskang ebidensiya sa Philippine Drug Enforcement Agency Laboratory Service para sa pagsusuri. (DDC)