Coach Tab Baldwin, team manager Epok Quimpo naka-leave muna habang may imbestigasyon

Kinumpirma ng pamunuan ng Atene de Manila University na habang nagsasagawa ng imbestigasyon kaugnay sa pagkasawi ng dalawa nilang manlalaro na sina Rene Clert Baterbonia at Divine Adili ay naka-leave muna si Head Coach Tab Baldwin at ang Team Manager na si Epok Quimpo.

Ayon sa pahayag ni University President Fr. Roberto Yap, layunin nitong ma-preserve ang total integrity, independence, at pagiging patas ng imbestigasyon.

Ito ay para din masigurong lahat ay makikipag-cooperate sa imbestigasyon nang walang pressure mula sa sinoman.

Sinabi ng Ateneo na nagkakasa na ng fact-finding inquiry sa nangyari batay na rin sa utos ng Board of Trustees ng Unibersidad.

Susuriing mabuti ang pangyayari, pag-aaralan ang transparent timeline, ire-review ang lahat ng umiiral na athletic protocols, at kakausapin ang bawat manlalaro at coaching staff na dumalo sa team-building activity.

Ang magiging resulta ng imbestigasyon ay isusumite sa Board of Trustees para sa karampatang aksyon.