BIR inireklamo ng P1B tax evasion si Alice Guo

Ipinagharap ng reklamong tax evasion sa Department of Justice si dismissed Bamban, Tarlac Mayor Alice Guo.

Ayon sa Bureau of Internal Revenue, nilabag ni Guo ang Section 254 ng National Internal Revenue Code dahil hindi ito naghain ng tax returns at hindi nagbayad ng buwis mula 2019 hanggang 2023.

Umabot umano sa mahigit one billion pesos ang utang sa buwis ng dating alkalde.

Isinailalim ng BIR sa imbestigasyon ang mga ari-arian ni Guo matapos nitong aminin sa pagdinig ng senado ang ilang properties na kaniyang pagmamay-ari.

Kabilang sa mga ari-arian ni Guo na natuklasan ng BIR ay mga real properties, iba’t ibang mga sasakyan, isang helicopter, mga bank account, stocks at iba pa.

Si Guo ay nakakulong sa Correctional Institution for Women sa Mandaluyong City matapos mahatulan sa kasong qualified human trafficking.