Lalaki nagpanggap na tumama sa lotto arestado sa PCSO Compound

Isang lalaki ang arestado sa mismong compound ng PCSO matapos itong magpanggap na nanalo sa lotto gamit ang pekeng lotto ticket.

Ayon sa PNP, pumunta sa PCSO Office sa Mandaluyong City ang suspek para i-claim ang 172-million pesos na napanalunan umano niya sa lotto.

Pero nang isagawa ang beripikasyon sa dala nitong ticket, lumitaw sa rekord ng PCSO na ang premyo para sa winning number combination ay na-claim na ng totoong nanalo.

Kalaunan ay kinumpirma ng PCSO Data Center and Security Office na tampered o pineke ang tiket na dala ng suspek.

Agad nang hinarang sa loob ng PCSO compound ang nasabing lalaki.

Inireklamo na din ito ng falsification of public document. (DDC)