Target na kaunlaran sa Metro Manila suportado ng MMDA
Suportado ni Metropolitan Manila Development Authority (MMDA) Chairman Don Artes ang ginanap na Regional Special Committee on Sustainable Development Goals (RSC-SDG) Meeting kamakailan, kung saan tinalakay ang SDG Catch-Up Plan para sa National Capital Region (NCR).
Binigyang-diin ni Artes ang kahalagahan ng Sustainable Development Goals (SDGs) bilang gabay sa inklusibong pag-unlad ng bansa na aniya’y tumutugon sa mahahalagang hamon gaya ng kahirapan, kalusugan, edukasyon, hindi pagkakapantay-pantay, at climate change, habang sinisiguro ang kapakanan ng susunod na henerasyon.
“The Sustainable Development Goals are not only a set of goals and indicators that are globally implemented to monitor progress in various sectors. Rather, the SDGs hold a powerful promise of leaving no one behind,” sabi ni Artes.
Ayon naman kay MMDA Deputy Chairman Frisco San Juan Jr., layunin ng pulong na pagtibayin ang koordinasyon at maglatag ng mga konkretong hakbang upang mapabilis ang pagtamo ng mga target ng SDGs bago ang taong 2030.
Inilahad sa pulong ang SDG Performance Results kabilang ang mga bagong indicators na idinagdag sa mga sektor na binibigyang-pansin sa plano gaya ng: economic, social, education, health, infrastructure, at institutional sectors upang higit pang mapahusay ang monitoring at pagsusuri ng progreso.
Ipinakikita ng SDG Catch-Up Plan ang mga agarang aksyon upang matugunan ang mga kakulangan at problema sa Metro Manila.
Dinaluhan ito ng mga opisyal ng MMDA, mga kinatawan mula sa regional line agencies (RLAs), local government units (LGUs), at private sector, kung saan nagbahagi sila ng kani-kanilang rekomendasyon at mungkahi pang higit pang mapabuti ang implementasyon ng SDGs sa NCR. (Bhelle Gamboa)
