Mga pelikulang hindi ‘G’ at ‘PG’ ratings bawal ipalabas sa mga bus

Nagpaalala ang MTRCB sa mga PUV operator na dapat mga pelikulang rated G at PG lang ang ipalalabas sa pag-biyahe ng kanilang mga sasakyan.

Ngayong Semana Santa at inaasahang marami ang bibiyahe pauwi sa malalayong lugar, at ayon sa MTRCB normal na ang movie marathon sa mga pampasaherong bus.

Inatasan ng MTRCB ang lahat ng operator na sumunod sa umiiral na patakaran sa pagpapalabas ng pelikula sa loob ng pampublikong transportasyon.

Ayon kay MTRCB Chairperson at CEO Lala Sotto ang mga pelikulang may “G” rating ay para sa lahat ng manonood at walang anumang eksenang makasasama sa mga bata.

Samantala, ang “PG” rating naman ay maaaring may ilang sensitibong eksena o tema kaya kailangan ng gabay ng magulang o nakatatanda.

Saklaw ng direktiba ng Board ang lahat ng common carriers tulad ng mga bus, barko at iba pang sasakyang pampubliko na nagpapalabas ng video o pelikula habang bumibiyahe. (DDC)