OFW repatriation ginagamit sa scam
Pinag-iingat ng Department of Migrant Workers ang publiko lalo na ang mag overseas Filipino workers laban sa tinawag nitong “repatriation racket”.
Sa abiso ng DMW, dapat mag-doble ingat ang mga Pinoy laban sa mga scammer na nagpapanggap na tumutulong sa repatriation efforts ng pamahalaan.
Modus ng mga ito ang mag-alok ng “priority” o “assured” flight pauwi kapalit ng bayad.
Nagpapanggap umano ang mga ito na konektado sa embahada at nanghihingi ng personal info at malaking processing fee.
Palala ng DMW, ang legit repatriation na ipinoproseso ng Philippine government sa pamamagitan ng DMW, OWWA, at DFA, ay libre at hindi ito ibinebenta.
Upang hindi maloko huwag basta magtiwala sa random messages sa Facebook, WhatsApp, o text at palaging i-check ang official pages ng mga ahensya ng gobyerno. (DDC)
