141 sa 616 graduates ng DFCAMCLP Batch 2025 nakakuha ng Latin Honors

Pinangunahan ni Mayor April Aguilar, Chairman ng Board of Trustees ng Dr. Filemon C. Aguilar Memorial College of Las Piñas (DFCAMCLP), ang 23rd Commencement Exercises na ginanap sa Aguilar Sports Complex sa Barangay Pilar sa nasabing lungsod.

Kasama ng alkalde ang mga konsehal mula District 1 at District 2 na nagpaabot ng kanilang personal na pagbati sa kabuuang 616 na estudyanteng nagsipagtapos sa iba’t ibang kurso.

Sa naturang bilang ng graduates, 141 rito ang nagkamit ng Latin Honors na resulta ng kanilang pagsisipag at pagtitiyaga na nagpapatunay sa dekalidad na edukasyong hatid ng institusyon.

Pinuri ni Mayor Aguilar ang dedikasyon ng mga estudyante at hinikayat silang ipagpatuloy ang pagsusumikap sa kanilang pipiliing landas.

Binigyang-diin pa ng alkalde ang matibay na suporta ng pamahalaang lungsod para sa edukasyon at inihayag na mananatiling isa sa mga pangunahing prayoridad ang libreng edukasyon para sa mga Las Piñero.

Aniya, ang tagumpay ng DFCAMCLP Batch 2025 ay patunay na ang pamumuhunan sa edukasyon ay nagbibigay ng bagong pag-asa at matibay na kinabukasan para sa Las Piñas. (Bhelle Gamboa)