Las Piñas LGU namahagi ng relief assistance sa mga nasunugan sa Brgy. Almanza Uno
Pinangunahan ni Las Piñas City Mayor-elect April Aguilar ang relief operations para sa mga pamilyang apektado ng sunog na sumiklab sa Samatierra Compound, Barangay Almanza Uno.
Muling bumalik si Mayor Aguilar sa nasabing evacuation center sa Almanza Uno Covered Court upang personal na tutukan ang pamamahagi ng mga pangunahing pangangailangan ng kabuuang 260 na indibidwal na nawalan ng tirahan dahil sa insidente.
Kabilang sa ipinagkaloob ng lokal na pamahalaan para sa mga nasunugan ay ang sleeping kits, hygiene kits, at food packs para tiyaking maabot ang karaniwang pangangailangan ng evacuees habang pansamantalang nanunuluyan sa evacuation center.
Ang maayos na distribusyon ng relief assistance sa mga biktima ay pinangasiwaan ng City Social Welfare and Development Office sa koordinasyon ng barangay at ng Disaster Risk Reduction and Management Office.
Unang naglagay ang lokal na pamahalaan ng mga modular tents para magkaroon ng pribado at kumportableng panunuluyan ng mga apektadong pamilya sa center.
Tiniyak ng lokal na pamahalaan sa publiko na magpapatuloy ang suporta nito sa mga susunod pang araw kasama na rito ang aid, health assistance, at tulong sa pagproseso ng kinakailangang dokumento para sa mga naapektuhang residente sa lugar. (Bhelle Gamboa)
