Tuloy ang anomalya sa BOC; P7M halaga ng smuggled frozen meat tinangkang ibenta

Meron na naman pa lang bagong bentahang nangyari sa mga kontrabandong nakumpiska ng Bureau of Customs.

Pagkatapos kasing mahuli ng Metro Manila Highway Patrol Group ang bentahan ng iligal na sigarilyo noong Agosto, sumunod namang nadiskubre ang bentahan ng mga nasakoteng 10 hanggang 15 toneladang smuggled chicken meat sa isang rendering facility sa Sta. Maria, Bulacan noong isang araw lamang.

Nagpanggap na buyer ang mga operatiba ng National Bureau of Investigation para mahuli sa akto ng pagbebenta ng frozen chicken drumstick na nagkakahalaga ng higit kumulang P7 milyon. Imbes na sinusunog na ito, binebenta pa sa publiko ng isang babaeng suspek nahuli ng NBI.

“Bukod pa to kasi ang balak pa nilang ibenta sa amin ay 81 tons. Subalit ang nailabas muna ay itong mga 10 to 15 tons na nakumpiska natin. Ang binebenta po nila sa amin ay tatlong container vans na galing po ito sa Bureau of Customs sa Subic, iyong for destruction,” ayon sa panayam ng GMA News kay Raymond Macaral, executive officer ng NBI Criminal Investigation Division.

Iisang lugar ang pinagmulan at bentahan ng mga nakumpiskang sigarilyo at frozen chicken meat. Isinagawa ito ng mga kawatan sa magkasunod na buwan. Marami ang nabubuong katanungan tuloy kung paano ito nakalusot sa BOC na namam. Ito ang ahensyang dapat na mahigpit na nagbabantay habang sinisira ang nasabing frozen chicken meat, di ba Commissioner Ariel Nepomuceno. Ano pa ang silbi ng pagkakahuli ng BOC dito kung kalaunan ay maibabalik lamang sa merkado? Alam natin ang banta sa kalusugan ng tao ang pwedeng maidulot nito.

Maituturing na itong double blackeye, di kaya commissioner? Meron nga tayong kasabihan, “one is enough, two is too much.” Kaya konti galaw galaw naman diyan!!!