BOC PERSONNEL NA NADATNAN SA WAREHOUSE NG YOSI SA BULACAN SA NAIA PALA NAKATALAGA?
Nananatiling kwestyonable ang pagkakatagpo sa dalawang tauhan ng Bureau of Customs sa sinalakay na warehouse ng sigarilyo sa Sta. Maria, Bulacan noong Agosto.
Isang dokumento kasi ang nalantad na nagpapakita na isa sa dalawang Customs Personnel na si Alexander “Alex” Arroyo Jr. ay itinalaga bilang Administrative Aide 2 o Messenger sa Customs House sa NAIA.
Ayon sa isang Customs Personnel Order (CPO), tinalaga pala si Alexander “Alex” Arroyo Jr., isang Administrative Aide 2 (Messenger), sa Customshouse sa Ninoy Aquino International Airport.
“Hindi pa nakapag-take oath of office yan si Alex,” saad ng isang insider.
“Kaka-submit pa lang ng requirements noong Agosto 10,” dagdag nito.
Batay sa nakalap na CPO, “Relative thereto, all the documentary requirements related to the attestation of appointment by the Civil Service Commission, as in the Checklist of Requirements to be sent by the Human Resources Division via electronic mail, must be compiled not later than 10 August 2026.”
Nasa isang investigative report na sinumite kay BOC Commissioner Ariel Nepomuceno na si Special Agent Lucky Joy “Joy” Solmayor lamang ang meron valid Mission Order sa nasabing warehouse kaya kinukuwestiyon ng Customs Police-Enforcement Security Service kung bakit nandoon din si Arroyo.
Ating matatandaan na nagsagawa ng raid ang HPG sa Sta. Maria, Bulacan noong Agosto 19, mahigit isang linggo pa lamang pagkatapos pinagsumite ng requirements si Arroyo para sa kanyang puwesto sa BOC-NAIA. Ang layo pala nang narating nitong si Arroyo mula sa airport na kanya dapat pinagtatrabahuhan.
Ano na naman kaya ang masasabi ni Commissioner Nepomuceno tungkol dito? Hindi lang pala ang kanyang sasabihin ang dapat nating alamin. Mas mahalagang malaman natin kung ano yung dapat niyang gawin.
Mukha na naman kasing nalusutan siya ng kanyang sariling tauhan gaya nitong 15 trailer trucks na may kargang ismagel na sigarilyo na naharang ng Central Luzon Police sa magkahiwalay ng operasyon sa Bataan at Pampanga noong gabi ng Sept. 7.
Nagkakahalaga ito ng malapit sa isang bilyong piso at nagmula ito sa isang seaport sa Mariveles, Bataan.
