Reklamong anomalya sa BOC nakarating na sa Malakanyang

Patuloy ang usok kaugnay ng mga alegasyong katiwalian sa loob ng Bureau of Customs. Ibig sabihin, hindi pa rin naapula ang apoy na pinagmumulan ng usok.

Matapos malantad ang isyu na pagkakasangkot sa extortion ng dalawang opisyal na sina “Direk CTN” at “Agent Dobol P” ay nakarating na umano sa Malakanyang ang reklamo.

Ito ay makaraang ilang concerned employees at stakeholders ang magparating nito sa Malakanyang.

Dahil dito meron na ring inilunsad na imbestigasyon ang Office of the Ombudsman.

Ikinasa ang nasabing imbestigasyon sa napaulat na alegasyon at pagkakasangkot umano ng dalawang taong ito sa “extortion” para mailabas ang huling iligal na shipment ng sigarilyo at vape.

Naharang kamakailan ang nasabing sigarilyo sa Bulacan samantala ang vape ay sa Port of Manila.

Pero hindi lang pala P10 milyon ang halaga ng perang hininging padulas bagkus ay P25 milyon daw para sa sigarilyo lamang.

“Yung sa yosi pala ang binigay ay P25 milyon. Isang bag na naglalaman ng P15 milyon tapos may isa pang P10 milyon sa isang malaking paper bag nung inabot. May mga litrato pala na nakuha,” ayon sa impormante.

Habang tumatagal tila nabubuo na natin ang mga pangyayari sa likod ng mga nahuling sigarilyo.

Apela naman ng mga empleyado ng Customs, sana ay magsalita at umaksyon dito ang pamunuan ng ahensya sa ilalim ng Customs Commissioner Ariel Nepomuceno.

Ito ay para hindi na lumala pa ang mga spekulasyon na nagkikibit balikat siya lamang o kaya may nalalaman siya sa insidente.