Mga estudyante hinikayat ng NCRPO na magsalita at humingi ng tulong
“You Are Not Alone,” ito ang binitiwang garantiya ng National Capital Region Police Office (NCRPO) bilang paghikayat sa mga estudyanteng magsalita at humingi ng tulong.
Kasunod ito ng insidenteng kinasasangkutan ng mga estudyante sa Tacloban City, Zamboanga City, at South Cotabato, hinikayat ni NCRPO Officer-in-Charge Police Brigadier General Christopher Abrahano ang mga kabataan at kanilang mga magulang na magsalita at agad humingi ng tulong kapag nakararamdam ng panganib, pagbabanta, bullying, harassment o iba pang problemang maaaring makaapekto sa kanilang kaligtasan at kapakanan.
Ayon kay PBGen. Abrahano, ipinapakita ng mga insidenteng ito ang kahalagahan ng maagap na pagkilos at mas mahigpit na pagtutulungan ng mga paaralan, pamilya, law enforcement, at iba pang kinauukulang institusyon.
“To our students, please know that you do not have to face your problems alone. If you feel that you are in trouble, if someone is threatening or hurting you, or if you are concerned about the safety of a friend or classmate, please tell your parents, teachers, school authorities, or approach the police. We are ready and willing to listen and assist you,” ani PBGen. Abrahano
Tiniyak din ng NCRPO OIC sa mga magulang na patuloy na nakikipagtulungan ang NCRPO sa mga paaralan at komunidad upang mapalakas ang seguridad at kaligtasan ng mga mag-aaral sa buong Metro Manila.
“To our parents, do not hesitate to reach out to us. Your concerns about the safety of your children are our concerns as well. We are more than willing to assist, coordinate with school authorities, and refer cases to the appropriate agencies when necessary,” ayon sa NCRPO OIC.
“The NCRPO is here to protect. We encourage our young people and their families: when something does not feel right, speak up, reach out, and seek help. We would rather respond to a concern early than respond after harm has occurred,” dagdag pa ng opisyal.
Kinikilala ng NCRPO na iba-iba ang maaaring maging banta sa kaligtasan ng mga estudyante, kabilang ang bullying, pagbabanta, harassment, pisikal na pananakit, online abuse, at matinding emotional o psychological distress.
Nanawagan si PBGen. Abrahano sa mga estudyante, magulang, guro, school administrators, barangay officials, at mga pulis na panatilihing bukas ang komunikasyon at agad ireport ang anumang banta, karahasan, seryosong bullying, pagkakaroon o access sa mga armas, at iba pang sitwasyong maaaring maglagay sa panganib sa mga estudyante o buong school community.
Binigyang-diin niya na mahalaga ang maagap na pagre- report dahil nagbibigay ito ng pagkakataon sa mga magulang, paaralan, pulisya na makapagbigay ng nararapat na tulong bago pa lumala ang isang sitwasyon.
Maaaring tumugon ang pulisya sa mga ulat ng pagbabanta o karahasan, magdokumento ng mga insidente, makipag-ugnayan sa mga school authorities at barangay officials, magsagawa ng nararapat na security interventions, at i-refer ang mga bata at kanilang pamilya sa mga kaukulang child-protection, social welfare, o mental-health professionals kung kinakailangan.
Alinsunod sa mga direktiba nina Interior and Local Government Secretary Jonvic Remulla at PNP Chief General Jose Melencio Nartatez Jr., sinabi ni PBGen. Abrahano na pinag-aaralan din ng NCRPO ang mga mekanismo tulad ng pagtatatag ng mga anti-bullying help desk bilang bahagi ng mga hakbang para mapangalagaan ang kapakanan ng mga mag-aaral.
Kasabay nito, binigyang-diin ni PBGen. Abrahano na ang mga usapin tungkol sa mental health ay dapat harapin nang may malasakit at i-refer sa mga kwalipikadong propesyonal, sa halip na agad iugnay sa criminal behavior.
“Let us create an environment where our children feel safe to speak, where parents feel comfortable asking for help, and where schools and law enforcement can work together before a problem becomes a tragedy. Reporting a concern is not an act of weakness—it can be an important step toward protecting a child,” pahayag ni PBGen. Abrahano. (Bhelle Gamboa)
