Husay ng kabataang Pinoy tampok sa WorldSkills Philippines Clark 2026

Pormal nang binuksan ng Technical Education and Skills Development Authority (TESDA) ang WorldSkills Philippines Clark 2026 (WSPC 2026), ang pangunahing pambansang kompetisyon sa kasanayan ng bansa na nagtatampok sa husay, talento, pagkamalikhain, katumpakan, at inobasyon ng mga kabataang Pilipinong may kasanayan.

Sa temang “Your Skills, Your Future,” tampok sa kompetisyon ang mahigit 30 skill areas at 298 competitors mula sa 18 rehiyon sa buong bansa. Susubukin ng mga kalahok ang kanilang kakayahan batay sa mga pamantayan ng industriya at sa mga internasyonal na pamantayang nakabatay sa WorldSkills framework.

Binigyang-diin ni TESDA Secretary Kiko Benitez ang kahalagahan ng pagdadala ng pambansang kompetisyon sa kasanayan sa Clark, na aniya’y magsisilbing malaking entablado para maipakita ng mga kabataang Pilipino ang kanilang kakayahan at magkaroon ng exposure sa mga pamantayan ng industriya at internasyunal na kompetisyon.

“Bringing the Philippine national edition of WorldSkills, the Olympics of Skills, to Clark for the first time is an important milestone. This competition is a spectacle, as it will showcase the world-class skills of young Filipinos, and hopefully will inspire more young people to see technical vocational education and training as a pathway to rewarding careers,” pahayag ni Secretary Kiko.

Ang pagbubukas ng seremonya ay hudyat ng pagsisimula ng isang linggong pagdiriwang ng kahusayan sa technical-vocational education and training (TVET), dito ipapakita ng mga kalahok ang kanilang kakayahan sa iba’t ibang larangan—mula sa digital at information technology, construction, hospitality, creative arts, at iba pang kasanayang mahalaga sa mga industriya.

Gaganapin ang kompetisyon mula Setyembre 8 hanggang 10. Susuriin ang mga kalahok batay sa kanilang technical knowledge, katumpakan, kalidad ng trabaho, pagkamalikhain, kahusayan, at kakayahang magbigay ng dekalidad na output kahit nasa ilalim ng pressure.

“Through WorldSkills Philippines, we are building a stronger pipeline of skilled professionals who can meet the needs of our industries and eventually carry the Philippine flag in international skills competitions. Gusto nating ipakita na ang husay ng kabataang Pilipino ay kayang makipagsabayan sa buong mundo,” dagdag ng TESDA chief.

Higit pa sa pagtukoy sa mga pinakamahusay na skills champions ng bansa, nagsisilbi rin ang WorldSkills Philippines Clark 2026 bilang pagkakataon para sa mga trainers, experts, industry partners, at iba pang stakeholders na magbahagi ng kaalaman, magpalitan ng pinakamahusay na mga pamamaraan, at isulong ang mataas na pamantayan ng kahusayan sa TVET.

Mahalaga rin ang kompetisyon sa pagtukoy at paghahanda sa mga Pilipinong maaaring kumatawan sa bansa sa mga internasyonal na WorldSkills competitions, bilang bahagi ng patuloy na pagpapalakas ng presensya ng Pilipinas sa pandaigdigang komunidad ng mga skilled professionals.

Mahaba na ang kasaysayan ng pambansang skills competition ng bansa sa pagkilala at paglinang sa husay ng mga Pilipinong may kasanayan. Nag-ugat ito sa National Youth Skills Olympics noong dekada 1980, na kalaunan ay naging Philippine National Skills Competition.

Lalo itong pinagtibay sa ilalim ng Republic Act No. 7796, o ang TESDA Act of 1994, na nag-aatas sa TESDA na isulong at paunlarin ang sistema ng skills competitions, kabilang ang pagsasagawa ng National Skills Olympics, upang matukoy at malinang ang mga natatanging skilled workers ng bansa. (Bhelle Gamboa)