Pagmamanman sa mga posibleng banta bago ang ASEAN summit pinaigting ng NCRPO
Patuloy na pinaiigting ng National Capital Region Police Office (NCRPO) ang intelligence monitoring at mga pagsusuri sa seguridad bilang paghahanda sa gaganaping 49th ASEAN Summit and Related Summits, kasabay ng pagtitiyak sa publiko na tuloy-tuloy ang paghahanda sa seguridad kahit na walang namo-monitor na seryosong banta sa pandaigdigang pagtitipon.
Ayon kay NCRPO Acting Director Police Brigadier General Christopher N. Abrahano, patuloy ang pangangalap at beripikasyon ng impormasyon ng mga intelligence unit, pagsusuri sa mga posibleng panganib sa seguridad, at mahigpit na pakikipag-ugnayan sa Armed Forces of the Philippines (AFP) at iba pang kinauukulang ahensiya ng pamahalaan upang matiyak ang maagap na pagtugon sa anumang posibleng banta o insidente.
Bagama’t wala pang namomonitor na beripikadong banta sa summit batay sa pinakahuling pagsusuri sa sitwasyon, binigyang-diin ni PBGen. Abrahano na hindi ito nangangahulugan na luluwagan ang pagbabantay at pagmamanman sa seguridad.
“We will not wait for a threat to materialize before we act. Our intelligence units are continuously monitoring developments, validating information, and working with our security partners to identify and address potential risks at the earliest possible stage,” ani PBGen. Abrahano.
Inatasan niya ang mga intelligence at operational unit ng NCRPO na agad imbestigahan ang mga impormasyong may kaugnayan sa seguridad, tiyaking sumasailalim sa wastong beripikasyon ang lahat ng naiuulat na banta, at magsagawa ng angkop na hakbang alinsunod sa umiiral na mga protocol at beripikadong intelligence information.
Hinimok din ni PBGen. Abrahano ang publiko na manatiling mapagmatyag at agad ireport sa pinakamalapit na himpilan ng pulisya o sa mga opisyal na communication channel ng NCRPO ang anumang kahina-hinalang aktibidad, mga gamit na iniwan nang walang nagbabantay, o impormasyong maaaring magkaroon ng implikasyon sa seguridad.
“Public vigilance is an important part of our security efforts. We encourage everyone to report anything suspicious, but we also remind the public to avoid spreading unverified information that could cause unnecessary alarm. Every report will be taken seriously and properly assessed,” dagdag ng heneral.
Tiniyak ng NCRPO sa mga residente, establisimyento, at mga dayuhang delegado na pananatilihin nito ang mahigpit na pagbabantay at kahandaan sa seguridad sa buong panahon ng summit. Kasabay nito, titiyakin na mapangangalagaan ang mga dayuhang bisita at mahahalagang lugar na pagdarausan ng mga aktibidad nang hindi naaantala ang regular na paghahatid ng serbisyo sa buong Metro Manila.
“Our position is clear: We remain vigilant, prepared, and proactive. We will not be complacent, and we will not compromise public safety,” pahayag ni PBGen. Abrahano. (Bhelle Gamboa)
