₱1.3-milyong halaga ng shabu, baril nakumpiska,4 drug personalities arestado sa Taguig City

Naaresto ng mga operatiba ng District Drug Enforcement Unit ng Southern Police District (DDEU-SPD) sa pamumuno ni Maj Cecilio G. Tomas Jr. ang apat na High-Value Individuals (HVIs) at nakumpiska ang tinatayang ₱1.3-milyong halaga ng ng umano’y shabu at baril sa gitna ng entrapment operation sa Barangay New Lower Bicutan, Taguig City, ngayong Miyerkules.

Ang mga suspek ay kinilalang sina alyas Tol, 37-anyos; alyas Michelle, 35-anyos; alyas Jamiel, 20-anyos; at alyas Junel, 28-anyos.

Dakong ala-1:10 ng madaling araw nagkasa ng joint buy-bust operation ang DDEU operatives kasama ang mga tauhan ng Taguig CPS Sub-Station 9 at Tactical Motorcycle Riding Unit (TMRU), sa kahabaan ng Roldan Street, Purok 2, Brgy. New Lower Bicutan.

Matagumpay ang drug transaction ng police poseur buyer kay alyas Tol na nagresulta ng pagkaaresto ng apat na suspek sa lugar.

Nakuha mula sa mga suspek ang 200 na gramo ng umano’y shabu na nagkakahalaga ng ₱1,360,000.00 habang narekober mula kay alyas Tol ang isang Glock 17 Gen 5 9mm pistol na kargado ng pitong bala, magazine, buy-bust money, cellular phone, at sling wallet.

Inihahanda ng otoridad ang pagsasampa ng kasong paglabag sa Section 5 (Sale), Section 11 (Possession), at Section 26 (Conspiracy) sa ilalim ng Article II of Republic Act 9165 ; at Republic Act 10591 (Comprehensive Firearms and Ammunition Regulation Act), laban sa mga suspek.

Pinuri ni SPD District Director BGen Rodel A. Pastor ang mga operatiba ng DDEU at Taguig CPS sa matagumpay na drug bust at pagkakumpiska ng ilegal na baril.

“The SPD will remain relentless in dismantling drug networks and removing loose firearms to preserve peace and order across the district,” pahayag ni BGen Pastor. (Bhelle Gamboa)