Hiwalay na imbestigasyon sa umano’y nawawalang pondo ng PDLs hindi na kailangan-CHR
Inihayag ng Commission on Human Rights (CHR) na hindi na kailangan ang pagsasagawa ng hiwalay na imbestigasyon sa umano’y nawawalang pondo ng persons deprived of liberty (PDLs) sa Correctional Institution for Women (CIW), dahil gumawa na ng kaukulang aksyon ang Bureau of Corrections (BuCor).
Ito ang naging pahayag ni Atty. Kathleen Kindipan, Attorney IV, Commission on Human Rights (CHR)- NCR sa gitna ng dayalogo sa mga kinatawan ng BuCor, CIW, at CHR na ginanap sa tanggapan ng CIW sa Mandaluyong City.
Ang dayalogo ay hiniling ng CHR upang alamin kung kailangan pa ba ng imbestigasyon kaugnay sa nasabing usapin.
Ayon kay Kindipan, walang natanggap ang CHR na anumang reklamo laban sa CIW, tanging mga reports na hindi alam ang pinanggalingan.Idinagdag nito na walang mga paglabag sa karapatang pantao dahil ang liderato ng BuCor ay nanguna sa pagpapaimbestiga at nilagay sa floating status ang mga opisyal at kawani na umano’y sangkot upang maiwasang impluwensiyahan ang kasalukuyang imbestigasyon.
“There may be a violation only if there is inaction. For now, we will monitor the case, request updates, and make recommendations regarding the system for handling PDL funds,” sabi ni Kindipan.
Tiniyak naman ni BuCor Deputy Director General for Administration Asec. Al Perreras, na dumalo sa dayalogo bilang kinatawan ni BuCor Director General Gregorio Pio P. Catapang Jr., sa mga opisyal ng CHR na welcome silang bumisita anumang oras sa CIW at ibang BuCor-operated prisons and penal farms.
Inimbitahin din ni Perreras ang CHR na sumali sa imbestigasyon upang ipakita na ang BuCor ay walang tinatago.
Ginatantiya din nito sa CHR na maliban sa mga kasong administratibo, sasampahan din ng criminal charges ang mga taong mapapatunayang responsable sa nawawalang pondo ng PDL kapag nakumpleto ang imbestigasyon.
“The axe will fall because we do not want the changes we have started in BuCor to go to waste because of this incident. We will get to the bottom of this without fear or favor,” pahayag ni Perreras. (Bhelle Gamboa)
