Madami pang kwento sa likod ng raid ng HPG sa warehouse ng yosi sa Bulacan
Lingid sa kaalaman ng ating mga kabayan, may iba pa lang nangyari sa isinagawang raid ng PNP-HPG sa isang warehouse sa Sta. Maria, Bulacan noong nakaraang isang buwan. Marahil masasabi natin na papunta na tayo sa exciting part!!!
Ayon sa isang memo para kay BOC Commissioner Ariel Nepomuceno ni SP/LT Erwin Kristoffer Gomez, investigator on case, na naglalaman ng investivation report sa insidente, mismong mga tauhan ng Customs Police-Enforcement Security Service ang may reklamo hindi lamang sa ginawa ng HPG Metro Manila kundi laban sa mga kasamahan nito sa ahensya.
Nilahad ng mga ESS Special Agents na si Special Agent Lucky Joy “Joy” Solmayor at Technical Support Staff Alexander “Alex” Arroyo Jr. ay nanghimasok umano sa condemnation activity at pinalilipat ang mga iligal na sigarilyo imbes na sirain. Sinabi ni Arroyo na “Okay na yan sa mga boss nyo”, gayundin si Solmayor na nagsabi rin na nakatimbre na ito sa tinutukoy niyang “commander” sa ahensya.
Ang dalawang ito ay sinampahan ng kaso ng PNP-HPG sa korte ng Malolos City noong Agosto 28 sa pagbebenta ng sinasabing iligal na sigarilyo.
Sa kanyang sinumpaang salaysay, positibong tinukoy ng naarestong middle man, Jesus Froilan Carpiso, ang dalawang BOC personnel na tumanggap umano ng kabayaran kapalit ng 225 boxes ng smuggled Red Carnival cigarettes sa entrapment, o buy-bust operation, na isinagawa noong Agosto 19.
Batay sa investigation report sinumite kay Nepomuceno, nabanggit si Joel Rana na isang manager ng nasabing warehouse, ang nagkasa ng baril at nagsimulang mag “dry firing” para takutin ang mga tauhan ng ESS.
Nasa report na ito na si Solmayor lamang ang meron valid Mission Order para i-monitor at i-verify ang condemnation activity kaya kinukuwestiyon nila kung bakit nandoon sa warehouse si Arroyo.
“SAI Lucky Joy Solmayor and Alexander Arroyo committed actions detrimental to the service. Including ESS operatives to assent to their illegal plan/s on the illegal cigarettes subject of the condemnation may hold them administratively and/or criminally liable for the same,” saad nito.
Habang tumatagal pakonti-konti nang lumalabas ang totoong nangyari. Dating magkaibang naratibo ang PNP-HPG at BOC pero nababago na ang ihip ng hangin na tumutumbok na ngayon sa mga maling gawain si Solmayor at Arroyo.
Ito ang malaking tanong: nilaglag na kaya ng BOC ang kanilang tauhan para proteksyuhan ang isang mataas na opisyal? May white wash kaya? Iyan ang hindi natin alam. Merong sariling internal investigation na ang kapulisan at BOC pero mas makakabuti siguro na makialam na rin ang Palasyo, Kongreso at Ombudsman sa bagay nito. Tingnan nating lahat. Abangan.
