Nasugatang sundalo ng PH Navy sinundo ng barko ng Coast Guard

Nagkasa ng medical evacuation ang Philippine Coast Guard sa dalawang nasugatang tauhan ng Philippine Navy matapos ang engkwentro sa mga crew ng China Coast Guard sa Ayungin Shoal.

Iniutos ni PCG Commandant Admiral Ronnie Gil Gavan ang deployment ng BRP Melchora Aquino at BRP Malapascua para masundo ang dalawang sugatang Navy personnel at malapatan sila agad ng lunas.

Habang ginagawa ang medical evacuation, nasa lugar pa ang mga barko ng China at nag-deploy pa ng rigid-hull inflatable boats at tinangkang harangin ang barko ng Coast Guard.

Sa kabila nito, matagumpay na nailipat sa BRP Melchora Aquino ang dalawang nasugatang sundalo na ang isa ay nagtamo ng sugat sa ulo at braso habang ang isa ay nagtamo ng sugat sa daliri.

Tiniyak ng Coast Guard na sa kabila ng mga aksyon ng China ay patuloy nitong poprotektahan ang teritoryo ng bansa sa ilalim ng international law kabilang ang 1982 United Nations Convention on the Law of the Sea at ang final and binding na 2016 Arbitral Award. (DDC)