2 bus ng politiko inimpound ng LTO

Dinala sa impounding area ng LTO ang dalawang bus na bumiyahe patungong Liwasang Bonifacio noong Linggo matapos mapansin na gumagamit ang mga ito ng improvised plate.

Ayon kay LTO chief, Assistant Secretary Markus V. Lacanilao, kabilang sa mga nakitang paglabag ay ang pagmamaneho ng hindi rehistradong sasakyan, hindi wastong pagkakabit ng plaka, at ilegal na pagpapalit ng kulay ng isang bus.

Ang dalawang bus ay may mukha ni dating Ilocos Sur Gov. Chavit Singson.

Ayon sa LTO, hindi palalampasin ng ahensya ang mga sasakyang bumibiyahe ng hindi rehistrado at gumagamit pa ng improvised plate dahil malinaw na paglabag ito sa umiiral na mga batas.

Pinaalalahanan din ng ahensya ang lahat ng mga operator at may-ari ng sasakyan na tiyaking rehistrado at sumusunod sa mga itinakdang alituntunin bago bumiyahe. (DDC)