PNP naka-full alert dahil sa pagtitipon ng INC sa EDSA

Nananatiling nasa full alert status ang Philippine National Police kasabay ng pagtitipon ngayong araw ng mga miyembro ng Iglesia ni Cristo sa EDSA People Power Monument.

Tiniyak ni PNP chief Police General Jose Melencio Nartatez Jr ang pagpapanatili ng peace and order sa ginaganap na pagkilos.

Kabilang sa nananatiling naka full alert ang National Capital Region Police office, lahat ng PNP office at units sa Camp Crame, ang Police Regional Office 3 at 4A.

Aabot sa halos anim na libong pulis ang ipinakalat sa mga pangunahing lugar kabilang ang People Power Monument, EDSA Shrine, Senado, Mendiola, Ayala Bridge, US Embassy at Liwasang Bonifacio.

Nanawagan si Nartatez sa mga lumalahok sa protesta na panatilihing payapa at maayos ang kanilang aktibidad. (DDC)