Online gaming app na GoreBox pinatawan ng ban ng CICC kasunod na shooting incident sa Tacloban

Pinatawan ng temporary ban ng Cybercrime Investigation and Coordinating Center ang gaming application na GoreBox kasunod ng ratratan sa isang paaralan sa Tacloban City.

Ayon sa CICC, batay kasi sa inisyal na imbestigasyon ng pulisya, isa sa dalawang Grade 9 students na sangkot sa insidente ay madalas na naglalaro ng GoreBox.

Isa itong online game kung saan ang mga user ay nagagawang ma-explore ang iba’t ibang armas at nagpapakita din ito ng karahasan.

Ayon kay CICC Undersecretary Aboy Paraiso, bilang precautionary measure ay pinatawan na ng ban ang GoreBox at hindi na muna ito ma-a-access ng users habang nagpapatuloy ang imbestigasyon.

Pina-igting din ng Threat Monitoring Center ng CICC ang surveillance nito sa online activities, kabilang ang mga madalas gumagamit ng GoreBox gaming app at kahalintulad na platforms. (DDC)