Dalawang menor de edad na sangkot sa pamamaril sa paaralan sa Tacloban naisailalim na sa Paraffin Test

Natapos na ang proseso ng paraffin test sa dalawang menor de edad na sangkot sa shooting incident sa paaralan sa Tacloban City.

Ayon sa update mula sa Police Regional Office 8, ang dalawang menor ay nananatili sa kostodiya ng Department of Social Welfare and Development Office at sumasailalim sa karampatang legal na proseso batay sa mga batas at regulasyon para sa mga children in conflict with the law.

Ayon kay PRO-8 Regional Director Police Brig. Gen. Jason Capoy, patuloy din ang imbestigasyon at pagkalap ng ebidensya sa insidente.

Una nang sinabi ni Capoy na mahigit isang buwan pinagplanuhan ang shooting incident.

Samantala, ang pulis na may-ari ng 9mm Glock pistol na na-rekober sa katorse anyos na menor de edad, ay sinibak sa kaniyang pwesto at isinailalim na sa restrictive custody. (DDC)