165 pang Pinoy mula Kuwait, ligtas na nakauwi sa bansa

Halos 11,000 overseas Filipino workers (OFWs) at kanilang mga pamilya, ligtas nang naiuwi ng pamahalaan mula nang magsimula ang krisis sa Gitnang Silangan

Ligtas nang nakabalik sa bansa ang kabuuang 165 pang Pilipino mula sa Kuwait lulan ng Cebu Pacific Flight 5J31 na lumapag sa Ninoy Aquino International Airport (NAIA) Terminal 3 nitong Hunyo 16, bilang bahagi ng patuloy na whole-of-government repatriation efforts ng pamahalaan para sa ating mga Kababayang Overseas Filipino Workers (OFWs).

Sa kabuuang bilang ng mga umuwi, 22 ang mula sa National Capital Region (NCR), 78 ang mula sa iba’t ibang bahagi ng Luzon, 28 ang mula sa Visayas, at 37 naman ang mula sa Mindanao.

Bago pa man ang kanilang pag-uwi sa Pilipinas, agad nang inasikaso ng OWWA On-Site Welfare Office at Migrant Workers Office (MWO) sa Kuwait ang kanilang mga pangangailangan upang matiyak ang maayos at ligtas na repatriation process. Bilang bahagi ng kanilang paglalakbay pauwi, ligtas silang naitawid mula Kuwait patungong Riyadh, Kingdom of Saudi Arabia (KSA), bago tuluyang bumiyahe pabalik ng Pilipinas. Ang operasyong ito ay naging posible sa pamamagitan ng mahigpit na koordinasyon ng mga Embahada, MWOs, OWWA, at iba pang katuwang na ahensya ng pamahalaan bilang bahagi ng whole-of-government response para sa kapakanan ng mga apektadong Pilipino.

Sa kanilang pagdaan sa Riyadh, nagbigay rin ng kaukulang assistance ang Philippine Embassy sa Kingdom of Saudi Arabia sa pangunguna ni Ambassador Raymond R. Balatbat, katuwang ang iba pang opisyal at kawani ng pamahalaan, upang matiyak ang maayos at ligtas na transit ng ating mga Kababayan.

Ayon kay OWWA Administrator Patricia Yvonne “PY” Caunan, hindi tumigil ang pamahalaan sa pagtugon sa pangangailangan ng mga Pilipinong naapektuhan ng krisis sa rehiyon.

“Sa bilin ni Pangulong Ferdinand R. Marcos Jr., tumugon ang pamahalaan mula pa noong unang araw ng kaguluhan noong Pebrero at nagpapatuloy ang ating mga operasyon hanggang ngayon. Hindi tumigil ang ating pagtulong. Sa pamamagitan ng Emergency Repatriation Fund ng OWWA, tuloy-tuloy nating napopondohan ang mga emergency flights upang mailigtas at maiuwi ang ating mga kababayan.

Mula nang magsimula ang krisis, halos 11,000 OFWs at kanilang mga pamilya na ang ligtas na naiuwi ng pamahalaan. Sa bilang na ito, 6,060 ang na-repatriate sa pamamagitan ng mga flights na pinondohan ng OWWA sa ilalim ng Emergency Repatriation Fund. Patunay ito ng patuloy na pangako ng pamahalaan na walang Pilipinong maiiwan sa panahon ng pangangailangan.

Ang flight na ito ay para sa 165 nating mga kababayan mula Kuwait na ligtas nating naitawid sa Riyadh bago tuluyang makauwi sa Pilipinas. Ang pinakamahalaga ay natulungan natin sila at muli nilang makakasama ang kanilang mga pamilya,” ani Caunan.

Aniya, ang repatriation na ito ay patunay ng whole-of-government approach ng administrasyon ni Pangulong Ferdinand R. Marcos Jr., kung saan magkakatuwang ang Department of Foreign Affairs (DFA), Department of Migrant Workers (DMW), Overseas Workers Welfare Administration (OWWA), mga Embahada at Migrant Workers Offices (MWOs), Department of Social Welfare and Development (DSWD), Department of Health (DOH), at iba pang national reintegration partners kabilang ang Department of Labor and Employment (DOLE), Department of Trade and Industry (DTI), Small Business Corporation (SB Corp.), Technical Education and Skills Development Authority (TESDA), Commission on Higher Education (CHED), at iba pang ahensya ng pamahalaan upang matiyak ang ligtas na pag-uwi, agarang ayuda, at matagumpay na reintegration ng mga repatriated OFWs at kanilang mga pamilya.

“Ang whole-of-government approach ang susi sa mas mabilis na koordinasyon at mas epektibong serbisyo para sa ating mga OFW. Kapag sama-sama ang buong pamahalaan, mula sa ating mga embahada at MWOs sa ibang bansa hanggang sa mga ahensyang tumutulong sa reintegration pag-uwi sa Pilipinas, mas mabilis nating naiaabot ang kinakailangang tulong at mas natitiyak natin na walang maiiwang Pilipino sa panahon ng krisis,” dagdag ni Caunan.

Kasabay nito, nagpahayag din ng pag-asa si Caunan sa mga ulat na may mga hakbang tungo sa pagbaba ng tensyon at posibleng pagresolba ng sigalot sa rehiyon.

“Anumang balita na magdadala sa mapayapang pagresolba ng sigalot ay aming malugod na tinatanggap. Nananatili tayong umaasa para sa isang pangmatagalan at makatarungang kapayapaan na magbibigay ng seguridad at katatagan sa rehiyon para sa kapakinabangan ng lahat, lalo na ng ating mga OFW na patuloy na nagsusumikap at nagsasakripisyo para sa kanilang mga pamilya. Habang nagpapatuloy ang ating pag-asa para sa kapayapaan, nananatili ring handa ang pamahalaan na tumulong at umagapay sa ating mga kababayan saan man sila naroroon,” ani Caunan.

Sa kanilang pagdating sa bansa, agad silang sinalubong ng mga tauhan ng OWWA na tumulong sa pag-asikaso ng kanilang mga bagahe at paghatid sa Philippine Trade Training Center (PTTC), na nagsisilbing holding area para sa mga bagong dating na OFWs bilang bahagi ng post-repatriation services ng pamahalaan.

Pinagkalooban ang ating mga Kababayan ng food assistance at special financial assistance bilang bahagi ng kanilang post-repatriation support. Ang mga OFWs na uuwi sa Visayas, Mindanao, at iba pang bahagi ng Luzon ay pansamantalang inihatid sa temporary accommodation habang inaayos ang kanilang mga domestic flight tickets pauwi sa kani-kanilang mga lalawigan.

Samantala, ang mga OFWs na residente ng Metro Manila, Region III, at Region IV-A ay binigyan ng land transportation assistance ng OWWA upang ligtas silang makabalik sa kanilang mga tahanan.

Patuloy na nakaagapay ang OWWA at ang iba pang ahensya ng pamahalaan sa pagbibigay ng agarang suporta, assistance, at reintegration services upang matulungan ang mga OFW na makapagsimulang muli kasama ang kanilang mga pamilya, alinsunod sa direktiba ni Pangulong Ferdinand R. Marcos Jr. (Bhelle Gamboa)