OFWs nagpasalamat sa TESDA sa libreng assessment at certification
Nagpaabot ng pasasalamat ang mga Overseas Filipino Workers (OFWs) sa Saudi Arabia at Hong Kong sa Technical Education and Skills Development Authority (TESDA) sa paghahatid ng libreng assessment at certification sa mga Filipino communities sa ibang bansa sa pamamagitan ng Overseas Assessment Program (OAP).
Sa pamumuno ni Secretary Kiko Benitez, ang OAP ay nagbibigay ng pagkakataon sa mga OFWs na sumailalim sa assessment at makakuha ng TESDA National Certificate (NC) o Certificate of Competency (COC) na hindi na kailangang bumiyahe pa pabalik sa Pilipinas.
Sa Riyadh, muling idinaos ng TESDA ang OAP, sa pakikipagtulungan ng Philippine Embassy at Migrant Workers Office (MWO) para sa mga OFWs sa Kingdom of Saudi ARabia. Ang assessment ay para sa Caregiving NC II, Health Care Services NC II, Massage THerapy NC II at Barista NC II.
Samantala, matagumpay na naisagawa ang kauna -unahang OAP sa Al Khobar, sa pakikipagtulungan ng Department of Migrant Workers, Procare Hospital at Saudi-Canadian Training & Simulation Center. Ang assessment ay para naman sa Caregiving NC II at Health Care Services NC II upang gawing abot-kamay ang certification services para sa silangang lalawigan ng Saudi Arabia.
Nakipagtulungan rin ang DMW sa TESDA para naman sa assessment na idinaos sa Jeddah para sa Caregiving NC II, Caregiving (Elderly) NC II, Health Care Services NC II, Massage Therapy NC II, Electrical Installation and Maintenance NC II, Electrical Installation and Maintenance NC III, PV Systems Installation NC II at Early Childhood Care Development NC III.
Ang pinagsanib na OAP sa Saudi Arabia ay nagresulta sa assessment ng 1,056 OFWs, kung saan 946 OFWs o 90 porsyento rito ang pumasa at nakakuha ng kanilang National Certificates.
Sa Hong Kong, idinaos ng TESDA ng assessment para sa Massage Therapy NC II, Kong saan 57 OFWs ang nagpa-assess at 49 ang pumasa ng kanilang National Certificates. Ito ay katumbas ng 86 na porsyento ng pagpasa.
Lubos na nagpapasalamat si Nuraina Sabdani, isang infection control nurse sa Riyadh sa inisyatibong ito ng pamahalaan. Ayon sa kanya, ang OAP ay pabor sa mga OFWs na hindi na kailangang gumastos at bumiyahe pa pabalik sa Pilipinas para lamang magpa-assess.
“Napaka-grateful po namin na may ganitong initiative ang government. That way, hindi na kailangang umuwi ng mga OFW natin sa ‘Pinas just to have an assessment. This gives them more flexibility,” sabi niya.
Nagpaabot rin ng paghanga sa inisyatibo si Rosalee Matanog, isang OFW sa Hong Kong, at binigyang-diin na mapalad ang mga OFWs dahil sa mga programang tumutugon sa kanilang pangangailangan.
“Napakaswerte po ng mga OFW na katulad ko kasi talagang pinaglaanan talaga nila ng time yung mga OFW. Concerned talaga sila sa aming OFW,” ayon sa kanya at binigyang-pansin ang commitment at atensyong ibinibigay ng pamahalaan sa kapakanan ng mga manggagawa sa labas ng bansa.
Gayundin, sa pagbisita sa Hong Kong, nilagdaan nina Sec. Kiko at Overseas Welfare Administration Administrator Patricia Yvonne Caunan ang Memorandum of Agreement upang higit na palakasin ang patutulungan sa mga programs sa skills development, assessment, certification, scholarship support at reintegration ng mga OFW. (Bhelle Gamboa)
