Mga Pinoy sa Hongkong binalaan kontra investment scam

Nagpaalala ang Konsulada ng Pilipinas sa mga Pinoy sa Hong Kong na maging maingat laban sa online investment scams.

Ayon sa abiso ng konsulada, kamakailan nakatanggap ito ng reklamo mula sa mga Pinoy na nag-invest sa platform na “Cora Wealths” na naka-base umano sa U.S.

Pinangakuan umano sila ng kita na 10 percent kada lingo para sa minimum investment na 1,000 US Dollars.

Hinihikayat ng platform ang mga OFW na magsilbi bilang recruiting agents at team leaders at pinapangakuan ng komisyon.

Sinabi ng konsulada na ang modus ng Cora Wealths ay kahalintulad ng pyramiding scheme.

Ayon sa konsulada, para hindi maloko, dapat agad nang ituring na red flag ang mga investment na may alok na napakataas na kita. (DDC)