MMC at RDC meeting sa MMDA produktibo
Naging produktibo ang Joint Metro Manila Council (MMC) at Regional Development Council (RDC) Meeting, na ginanap sa MMDA Head Office sa Pasig City, ngayong araw ng Martes.
Pinangunahan nina MMDA Chairman Atty. Don Artes at San Juan City Mayor at MMC President Francis Zamora ang nasabing pulong.
Kabilang sa mahahalagang resolusyong tinalakay ang pagbalangkas ng ordinansa na mag-oobliga sa mga junk shop owners/operators na tiyaking legal at hindi nakaw ang mga ibinebentang materyales sa kanila. Sa nakalipas na apat na buwan, nakapagtala ang MMDA ng tatlong insidente ng pagnanakaw ng cable wires sa magkakahiwalay na lugar sa Maynila, Muntinlupa, at Quezon City.
Inaprubahan ang resolusyon na nagbibigay-pagkilala sa International Solid Waste Integrated Management Specialist Inc. at San Mateo Landfill and Development Corporation para sa kanilang agarang aksyon at pagsisikap kaugnay ng fire incident sa Navotas Sanitary Landfill. Nag-deploy sila ng heavy equipment at personnel upang magsagawa ng soil capping at gumamit ng engineering solutions para ma-contain ang sunog.
Pinag-usapan din ang mga proposed projects gaya ng Bagong Baclaran Multimodal and Market Hub, MMDA K-9 Training Facility, at Nature-based Sidewalk Project with Permeable Pavement.
Ibinahagi naman ni MMDA General Manager Usec. Nicolas Torre III ang MMDA Hotline 136, kung saan kanyang ibinida ang “5-5-5 Service Guarantee” o 5-ring answer, 5-minute response, at 5-minute resolve.
Tinalakay din ng opisyal ang mga programang may kaugnayan sa:
• CCTV interconnectivity sa bawat lokal na pamahalaan ng Metro Manila,
• Anti-littering remote monitoring, at
• Tapayan Water Hyacinth Processing Facility.
Dumalo rin sa pagpupulong sina Parañaque City Mayor Edwin Olivarez, Pasay City Mayor Imelda Calixto-Rubiano, Mandaluyong City Mayor Menchie Abalos, Pateros Mayor Gerald German, at iba’t ibang kinatawan mula sa iba pang ahensiya ng gobyerno. (Bhelle Gamboa)
