500 pang PDLs ng Bilibid inilipat sa Puerto Princesa, Palawan

Sa nagpapatuloy na hakbangin sa pagpapaluwag sa mga piitan, inilipat ng Bureau of Corrections ang 500 pang persons deprived of liberty (PDLs) mula sa New Bilibid Prison (NBP) sa Muntinlupa City patungong Iwahig Prison and Penal Farm (IPPF) sa Puerto Princesa, Palawan.

“This transfer is to alleviate congestion at the NBP, and it aligns with our long-term program to close down NBP by 2028,” pahayag ni BuCor Director General Gregorio Pio P. Catapang Jr.

Ang inisyatibong ito ay sumasalamin sa pangako ng ahensiya na pagandahin ang kalidad ng buhay at mga oportunidad ng rehabilitasyon para sa mga nakakulong na indibiduwal habang epektibong pinamamahalaan ang kapasidad ng pasilidad.

Target ng BuCor ngaypng taon na mailipat ang tinatayang 7,500 PDLs sa mga operating prisons and penal farms sa bansa.

Sinabi ni Catapang na ang paglilipat ay inaasahang makatutulong sa pagbalanse ng distrubusyon ng populasyon, maibsan ang siksikan na magdudulot ng mga tensiyon, at mapaganda ang seguridad sa mga pasilidad.

“The IPPF offers a unique environment that supports agricultural work and vocational training programs, which are crucial for the successful reintegration of PDLs into society,” dagdag ni Catapang.

Tiniyak ng opisyal na sa isinagawang transfer operation ay istriktong sinunod ang lahat ng safety protocols para sa maayos na galaw ng inmates.Nagsagawa rin ng puspusang koordinasyon ang BuCor sa mga lokal na opisyal ng Palawan para maayos at organisadong pagtanggap sa mga parating na PDLs.

Sa kabilang banda, iniulat ng BuCor authorities ang matagumpay na pagkaaresto ni PDL Albert Olarte,na tumakas mula sa Iwahig Prison and Penal Farm nitong nakaraang linggo.

Isinagawa ang joint operation ng IPPF Fugitive Recovery Team kasama ang National Bureau of Investigation (NBI) sa Palawan na nagresulta ng pagkadakip ni Olarte sa Eulala Park, Barangay Liwanag, Puerto Princesa City noong Huwebes.

Si Olarte ay nakatakas sa kustodiya noong Marso 19 habang iniiskortan mula sa Agro-Palay 2 patungong Minimum Security Compound sa loob ng naturang kulungan.Ang agarang pagkaaresto ng inmate ay nagbigay-diin sa tuluy-tuloy na pagiging mapanuri at kolaborasyon sa pagitan ng mga ahensiyang tagapagpatupad ng batas upang panatilihin ang kaayusan at seguridad sa penal system.

Pinuri ni Catapang ang mga hakbang ng mga nasabing operatiba.

“The swift action taken by the IPPF Fugitive Recovery Team and the NBI demonstrates our unwavering commitment to uphold security and discipline within our facilities. We will continue to strengthen our operational capabilities to prevent similar incidents.” (Bhelle Gamboa)