4 na taong gulang na batang lalaki natagpuang patay sa washing machine sa Las Piñas

Matapos maiulat na nawawala, isang 4-taong gulang na lalaki ang natagpuang patay sa loob ng washing machine sa Las Piñas City.

Kinilala ni Las Piñas City Police Chief, Col. Jaime Santos ang biktima na si Prince Mondero, 4-anyos, ng No. 20 Bagong Lipunan Street corner Calamansi St., Barangay Caa, Las Piñas City.

Samantala iniimbestigahan naman ng otoridad ang 15-anyos na tiyuhin ng biktima na huling kalaro ng bata.

Ayon sa report, nadiskubre ang bangkay ng bata matapos umalingasaw ang mabahong amoy sa loob ng kanyang silid kung saan natunton ang pinanggagalingan nito sa isang washing machine.

Batay sa inisyal na imbestigasyon nitong Biyernes,May 26 hinanap ng ginang ang kanyang anak na si Patrick sa loob ng nirerentahang bahay subalit hindi nito nakita ang bata kaya sinabihan ang mister na hanapin sa taas ng kuwarto subalit hindi natagpuan.

Nakaamoy ng mabahong amoy ang ginang sa loob ng silid ng biktima hanggang sa matagpuan ang bangkay ng kanyang anak.

Sinasabing huling nakalaro ng binatilyo ang pamangkin at aksidente umanong nahulog sa hagdan ang bata bago nawalan ng malay.

Sa sobrang takot umano ng binatilyo ay inilagay nito ang nawalang ulirat na biktima sa loob ng washing machine bago umalis ng bahay ang suspek.

Matapos madiskubre ang bangkay ng bata ay nagpasya naman ang nanay ng binatilyo na isuko ang anak sa otoridad.

Hinihintay pa ng otoridad ang resulta ng awtopsiya sa labi ng bata upang matukoy ang sanhi ng kanyang pagkamatay. (Bhelle Gamboa)