Mga bagong heavy equipment, mas magpapahusay sa mga serbisyo ng Las Piñas LGU

Pinabasbasan ng Pamahalaang Lungsod ng Las Piñas ang mga karagdagang bagong heavy equipment ng City Environment and Natural Resources Office (CENRO Las Piñas) at Office of the City Engineer na gagamitin para sa pagpapanatili ng kaayusan at kalinisan ng lungsod.

Para sa CENRO, nadagdagan ang kanilang kagamitan ng dump truck na may 9-cubic-meter hauling capacity at water truck na may 4,000-litro na kapasidad na gagamitin sa paghahatid ng tubig sa mga komunidad sa tuwing mayroong water interruption o pagkaantala ng suplay ng tubig.

Nagdagdag naman ang City Engineering Office ng wheel crawler excavator at walk-behind vibratory road roller na magagamit sa paghuhukay, road works, compaction at iba pang pagmamantina ng imprastraktura sa lungsod.

Ang mga bagong kagamitan ay makatutulong upang mas mapabilis ang pagtugon sa pangangailangan ng mga komunidad at mapalakas ang araw-araw na serbisyo ng lungsod. (Bhelle Gamboa)