Serbisyong pangkalusugan ng Las Piñas LGU, mas mailalapit na sa Las Piñeros
May karagdagang mga serbisyong pangkalusugan ang Pamahalaang Lungsod ng Las Piñas na mas inilalapit sa mamamayan at komunidad.
Kasunod ito sa isinagawang simpleng blessing ng bagong Dental Bus at Mobile Botika ng Lungsod ng Las Piñas, na ginanap sa city hall grounds.
Ito na ang ikalawang dental bus na magagamit ng lungsod partikular ng City Health Office para sa pagsasagawa ng Health and Wellness Caravan sa mga barangay at paaralan. Mayroon itong dalawang dental chair sa loob, air-conditioning at CCTV, upang makapaghatid ng maayos at komportableng dental services sa mga Las Piñero.
Kasabay nito, inilunsad din ang Mobile Botika, isang natatanging serbisyo ng Las Piñas na magdadala ng mga libreng gamot at bitamina para sa mga residente.
Patuloy na pinalalakas ng lungsod ang mga serbisyong pangkalusugan upang direkta at mabilis itong makarating sa mga Las Piñero. (Bhelle Gamboa)
