Higit 2,000 OFWs napagsilbihan na sa OFW Transit Lounge sa NAIA Terminal 3
Sa mahabang biyahe, malaking ginhawa ang may mahihigaan, mapagliliguan, at maayos na lugar para makapagpahinga habang hinihintay ang susunod na flight.
Ito ang hatid ng OFW Transit Lounge sa NAIA Terminal 3, na pormal na inilunsad ngayong Nobyembre 11, 2026, kung saan mahigit 2,000 na overseas Filipino workers (OFWs) na ang napagsilbihan nito mula nang magsimula ang operasyon.
Karagdagang pasilidad ito sa kasalukuyang OFW Lounge sa Terminal 3 na mayroong mga kama, massage chairs, shower area, at hygiene kits upang makapagpahinga at makapag-ayos ang ating mga kababayan bago magpatuloy sa kanilang paglalakbay.
Kabilang sa mga maaaring gumamit ng lounge ang mga paalis na OFW na may kumpirmadong international flight at OFWs na dumarating mula sa international flight at may kasunod na domestic flight patungo sa kanilang probinsiya.
Ang lounge ay kayang tumanggap ng hanggang 26 OFWs nang sabay-sabay, maximum na tatlong oras lamang mula check-in ang pananatili upang mas maraming kababayan ang makagamit at makapagpahinga, at first come, first served basis ang pagtanggap, depende sa bakanteng espasyo.
“Alam nating nakakapagod ang mahabang biyahe, lalo na kung may kasunod pang flight. Gusto nating may maayos na lugar ang ating mga OFW para makahiga, makaligo, at makabawi ng lakas. Sa pag-alis man para magtrabaho o sa pag-uwi sa pamilya, nais nating maramdaman nilang may nag-aalaga sa kanila,” ani OWWA Administrator PY Caunan.
Kasama ang mga OFW Lounge sa mga Alagang OWWA Centers na itinayo para sa ating mga OFW upang mas mailapit ang serbisyo at magkaroon sila ng maayos na lugar na malalapitan at mapagpapahingahan. Bahagi ito ng patuloy na pagpapabuti ng serbisyo, alinsunod sa direktiba ni Pangulong Ferdinand R. Marcos Jr.
Ipinapaabot ng ahensiya ang pasasalamat nito sa tuling ng New NAIA Infra Corp. upang maisakatuparan ang pasilidad na ito.
Pinapayuhan ang ating mga kababayan na basahin ang kalakip na guidelines para sa maayos na paggamit ng lounge at paggalang sa pahinga at privacy ng bawat isa. Para sa tulong pagdating sa bansa, lumapit sa reception desk o tumawag sa OWWA Hotline 1348. (Bhelle Gamboa)
