MMDA nakipagpulong sa mall operators
Nakipagpulong ang Metropolitan Manila Development Authority (MMDA) sa iba’t ibang shopping mall operators upang talakayin ang mga hakbang para matiyak ang maayos na daloy ng trapiko sa Metro Manila ngayong nalalapit na Pasko.
Alinsunod ito sa direktiba ni MMDA Chairman Atty. Don Artes na tiyakin ang maayos na daloy ng trapiko at maiwasan ang matinding pagsisikip sa mga pangunahing lansangan sa Metro Manila sa gitna ng inaasahang pagdagsa ng mga mamimili at motorista ngayong holiday season.
Ipinrisinta ni MMDA Traffic Discipline Office Director Atty. Victor Nuñez ang mga traffic management measures na ipatutupad mula Nobyembre 16 hanggang Disyembre 25, 2026, upang maibsan ang pagsisikip ng trapiko, partikular sa mga pangunahing lansangan at lugar na nakapaligid sa mga shopping mall.
Kabilang sa mga napagkasunduang hakbang ang pag-a-adjust ng operating hours ng mga shopping mall mula 11:00 ng umaga hanggang 11:00 ng gabi simula Nobyembre 16, 2026 hanggang Disyembre 25, 2026. Hindi naman sakop ng mall hours adjustment na ito ang weekends at holidays. Lilimitahan din ang delivery operations mula 11:00 ng gabi hanggang 5:00 ng madaling-araw, maliban sa deliveries ng perishable goods gaya ng pagkain at yelo.
Kailangan ding magsumite ng mga mall operators ng kani-kanilang traffic management plan sa MMDA dalawang linggo bago ang kanilang nakatakdang mall sales at promotional events.
Papayagan lamang ang mall-wide sales tuwing weekends. Maaari namang magsagawa ng sale ang mga indibidwal na outlets sa loob ng mga mall tuwing weekdays, hangga’t sa walang anunsyo, advertisement, o tarpaulin na gagawin para rito.
Mananatili naman sa kanilang regular na business hours at hindi sakop ng itinakdang operating hours adjustment ang mga restaurant, supermarket, at government services na matatagpuan sa loob ng mall premises.
Bibigyan ng pagkakataon ang mga sinehan na magbukas ng mas maaga sa Disyembre 25, 2026, upang mas matugunan ang inaasahang pagdami ng mga manonood ng sine ngayong Pasko.
Dumalo sa pulong ang mga kinatawan mula sa Ayala Malls, SM Malls, Ortigas Land, Robinsons Land, Araneta City, The Podium, Lucky Chinatown, at iba pang shopping mall operators. (Bhelle Gamboa)
