Mas malawak na oportunidad sa trabaho abroad tinututukan ng TESDA

Tinututukan pa ng Technical Education and Skills Development Authority (TESDA) ang mas malawak na pagkilala sa kasanayan ng mga manggagawa upang mapadali ang paggalaw at paghahanap ng trabaho ng mga Pilipino sa ibang bansa.

Tinalakay ang usaping ito sa WorldSkills Conference: Shaping a Skills-Driven Future sa Shanghai, China, na dinaluhan ng mga lider at eksperto mula sa iba’t ibang bansa upang talakayin ang nagbabagong pangangailangan ng workforce.

Nakibahagi si TESDA Secretary Kiko Benitez bilang panelist sa isang sesyon na tumalakay sa papel ng pagkilala sa kasanayan sa pagtatrabaho sa ibang bansa, patuloy na pagkatuto, at pagtugon sa pangangailangan ng labor market habang lumalawak ang paggamit ng skills-first approach sa buong mundo.

“Skills recognition is becoming increasingly important as workers move across borders and industries look beyond traditional qualifications. We need systems that recognize what people know and can do, wherever and however those skills were acquired,” ani Sec. Kiko.

Pinag-usapan sa sesyon kung paano makatutulong ang mga pambansa at pandaigdigang competency framework at pamantayan sa pag-uugnay ng mga sistema ng kwalipikasyon, skills taxonomy, digital at micro-credentials, at mga sertipikasyon mula sa pribadong sektor.

Maaari itong magsilbing karaniwang batayan sa pagkilala sa kakayahan ng isang manggagawa at makatulong upang mas madaling tanggapin ang kanyang mga kasanayan sa iba’t ibang bansa at labor market.

Binigyang-diin din ni Sec. Kiko ang lumalaking papel ng industriya sa pagtukoy at pagpapatunay ng mga kasanayan, kabilang ang mga qualification at certification na ibinibigay ng pribadong sektor.

Aniya, mahalagang maisama ang mga ito sa mga pambansang sistema ng kwalipikasyon habang tinitiyak na nananatiling bukas at abot-kaya ang mga oportunidad para sa mga manggagawa at learners.

“As industry becomes more involved in defining and certifying skills, we also have to make sure that these opportunities remain accessible. Skills recognition should help open doors, not create additional barriers for those who need opportunities the most,” aniya.

Sa sesyon ay tinalakay din ang pagkilala sa mga kuwalipikasyon mula sa ibang bansa, digital credentials, regional qualifications frameworks, at mga modelo ng apprenticeship at work-based learning na maaaring isagawa sa iba’t ibang bansa.

Nagbahagi ang mga kalahok ng kanilang mga karanasan at pamamaraan kung paano mapapalakas ang skills mobility at ang ugnayan ng training at employment.

Bahagi ang paglahok ng TESDA sa conference ng patuloy nitong pakikipag-ugnayan sa global skills community upang makapagpalitan ng kaalaman at matuto mula sa mga pandaigdigang pamamaraan sa skills development. Layunin din nitong tuklasin ang mga maaaring iangkop na hakbang upang higit na mapalakas ang TVET system ng bansa.

Napapanahon ang mga talakayang ito habang kinakatawan ng 11 kabataang Pilipino ang bansa sa WorldSkills Shanghai 2026 sa 10 skill areas. Nakikipagtagisan sila sa mga skilled youth mula sa iba’t ibang bansa, habang ipinakikita ang kakayahan ng mga Pilipino at inihahambing ang kanilang kasanayan sa mga pandaigdigang pamantayan.

Sa ilalim ng pamumuno ni Pangulong Ferdinand “Bongbong” Marcos Jr. at Sec. Kiko, patuloy na isinusulong ng TESDA ang skills development na tumutugon sa pangangailangan ng mga mag-aaral, manggagawa, at industriya, at nagbubukas ng mas maraming oportunidad para sa mga Pilipino sa pandaigdigang labor market.

Kasama ni Sec. Kiko sa panel sina Commissioner Cameron Baker, Chair ng South Australian Skills Commission; Elizabeth Warn, Head of Labour Mobility ng International Organization for Migration; Zhou Hanmin, Member ng Standing Committee of the CPPCC National Committee at President ng Shanghai Public Diplomacy Association; at Diego Andrés Lopez Garro, WorldSkills Champions Trust Representative for the Americas. (Bhelle Gamboa)