Dating House Speaker Lord Allan Velasco wala sa bansa ayon sa BI

Kinumpirma ng Bureau of Immigration na nasa labas ng bansa si dating House Speaker Lord Allan Velasco.

Ayon sa pahayag ng BI, batay sa kanilang rekord, walang umiiral na Hold Departure Order o HDO at wala ding derogatory alert laban kay Velasco kaya hindi ito maaaring pigilan na umalis ng bansa.

Hindi naman ibinunyag ng BI ang mga detalye ng biyahe ni Velasco maging ang lugar kung saan ito nagpunta bilang bahagi ng data privacy.

Una nang sinabi ni NBI director Melvin Matibag na umalis ng bansa si Velasco at nagtungo sa Nagoya, Japan noong August 30.

Ayon kay Matibag, dapat September 14 ay nakabalik na ng bansa si Velasco pero hindi ito umuwi.

Sinabi rin ng NBI chief na ang misis ng dating House Speaker kasama ang dalawang iba pa ay bumiyahe patungong Hong Kong noong September 24 at ang dapat na balik ng bansa ay noong September 27 pero wala itong rekord ng pag-uwi sa Pilipinas. (DDC)