NBI handang imbestigahan si Rep. Paolo Duterte kung masasangkot ito sa krimen o anomalya
Nakahanda ang National Bureau of Investigation na magkasa ng imbestigasyon kay Davao City 1st District Rep. Pulong Duterte kung sakaling may kinalaman ito sa mga krimen.
Sa isang ambush interview, sinabi ni NBI Director Atty. Melvin Matibag na bahagi kasi ng mandato ng NBI na magsagawa ng imbestigasyon sa sinomang sabit sa ilegal na gawain.
Ayon kay Matibag, ‘no one is above the law’, kaya kung may report ng korapsyon o iba pang anomalya at krimen, iniimbestigahan na ito ng ahensya kahit sino pa ang sangkot.
Una nang tinuligsa ni Cong. Duterte ang pagsilip umano sa ari-arian ng kanilang pamilya.
Ani Duterte isang ahensya ng gobyerno ang nag-utos sa Investigation Division for Public Corruption na imbestigahan ang yaman ng pamilya Duterte.
Bagaman hindi tinukoy ng kongresista na NBI ang nag-atas ng imbestigasyon, nagbigay ito ng mensahe sa isang ‘Mr. Matibay’ na hindi umano dapat itulad ang Pamilya Duterte sa amo nitong korap. (DDC)
