Las Piñas LGU mariing kinondena ang karahasan sa paaralan
Mariing kinukondena ng Pamahalaang Lungsod ng Las Piñas ang lahat ng uri ng karahasan lalo na sa paaralan na dapat ay nananatiling ligtas na lugar para matuto ng kaalaman, umunlad, at kapakanan ng mga estudyante.
Ikinalungkot ng lokal pamahalaan ang nangyaring karahasan na kinasangkutan ng dalawang Grade 9 learners ng Las Piñas National High School kamakailan na nagresulta ng pagkamatay ng isang estudyante.
Nagpaabot din ang Las LGU ng taos-pusong pakikiramay sa naulilang pamilya at mahal sa buhay ng biktima.
Nagdasagawa ng malapit na koordinasyon ang lokal na pamahalaan sa Schools Division Office ng lungsod, sa administrasyon ng Las Piñas National High School, Philippine National Police, at iba pang kaukulang mga ahensiya. Patuloy din na minomonitor ang sitwasyon at imbestigasyon para tiyaking lahat ng nararapat na hakbang ay maisakatuparan.
Batay sa opisyal na kalatas ng paaralan at ng SDO ng Las Piñas, ang pamunuan ng naturang eskwelahan, na gumugulong na ang masusing imbestigasyon at binigyan ng Psychological First Aid, psychosocial support, at iba pang kinakailangang intebensyon sa mga apektadong estudyante,guro at school personnel.
Bilang pagpapatupad ng pag-iingat, naglagay ng mga metal detectors at security scanners sa mga paaralan sa lungsod. Inutos din ni Mayor April Aguilar sa Las Piñas City Police Station ang maigting na police visibility sa lahat ng pampublikong paaralan sa lungsod habang pinag-aaralan ang umiiral na hakbang pangseguridad at palakasin ang malapit na ugnayan sa Department of Education at awtoridad ng eskwelahan.
Inatasan ni Mayor Aguilar ang Las Piñas City Social Welfare and Development sa koordinasyon sa DepEd na magsagawa ng debriefing sessions, counseling, at psychosocial interventions sa mga estudyante sa apektadong paaralan para siguruhing matatanggap ng mga ito ang emosyunal na suportang kailangan upang makabangon sa nangyaring trahedya.
Nanawagan naman ang lokal na pamahalaan sa publiko na maging responsable sa paggamit ng social media.Pinaalalahanan ang mamamayan na iwasang magbahagi ng hindi beripekadong impormasyon, larawan, o videos na magkokompromiso sa isinasagawang imbestigasyon o magdulot ng lalong sakit sa damdamin ng pamilya at mga sangkot na menor-de-edad.
Binigyang-diin ng Las Piñas LGU na nananatiling pinakaprayoridad ang kaligtasan at kapakanan ng bawat estudyante.Puspusan ang pakikipagtulungan ng lokal na pamahalaan sa DepEd, PNP, magulang,at sa buong komunidad upang palakasin ang school safety measures at tiyakin ang mga eskwelahan ay ligtas, payapa, at makakabuting lugar para sa mga batang nais matuto ng may kumpiyansa at pag-asa. (Bhelle Gamboa)
