Opisyal ng SAICT na nanuntok ng driver ng kolorum na van, sibak sa pwesto

Iniutos ni Transportation Secretary Banoy Lopez na masibak sa pwesto ang isang tauhan ng Special Action and Intelligence Committee for Transportation o SAICT matapos manuntok ng driver ng hinuling colorum na van.

Ayon kay Lopez, bagaman may mali ang driver ng van, hindi ito dahilan para manakit ang SAICT officer.

Agad iniutos ni Lopez na matanggal sa pwesto ang opisyal.

Sa report ng SAICT, nagsasagawa ng anti-colorum operation ang kanilang team sa Calaca, Batangas at pinara ang isang van na may sakay na labinglimang pasahero.

Pero sa halip na huminto ay nakipaghabulan pa ang van sa mga otoridad at ilang beses nasagi ang sasakyan ng SAICT.

Sa mga lumabas na video sa social media, nakitang sinuntok ng isang SAICT officer ang driver ng colorum van matapos itong mahuli. (DDC)