DFA nagkasa ng diplomatic protest dahil sa racist post ng China Daily

Pormal nang ipinrotesta ng Department of Foreign Affairs ang China Daily sa serye ng op-ed videos at editorial cartoons nito na nagtatampok sa mga Pinoy.

Ayon sa pahayag ng DFA, nag-isyu na ang ahensya ng formal diplomatic protest na kumokondena sa mga video at cartoons na inilabas ng China Daily.

Sinabi ng DFA na sa halip na lehitimong political debate ay nag-resort ang China sa pagmamaliit, pagiging hindi makatao at racist depictions sa mga Pinoy.

Sa protestang inihain ng DFA, sinabi nitong bagaman paulit-ulit na tinututulan ng Pilipinas ang mga maling naratibo ng China tungkol sa Arbitral Award ang mga hindi pagkakasundo sa legal at political issues ay hindi naman dapat mauwi sa ganitong paraan ng pagsagot ang China.

Iginiit din ng DFA ang pag-takedown sa AI video at editorial cartoon na naka-post sa social media page ng China Daily.

Ang Philippine Embassy sa Beijing ay nagpadala din ng formal letter sa Editor-in-Chief ng China Daily para i-demand ang pag-takedown sa mga offensive material.

Noong Huwebes, personal ding nakausap ni Foreign Affairs Undersecretary Leo Herrera-Lim si Chinese Ambassador Jing Quan at sinabi nitong ang mga content ng China Daily ay inconsistent sa umiiral na mutual respect sa pagitan ng dalawang bansa. (DDC)