LTFRB ipinatawag ang operators ng 34 na PUVs na ginamit sa QC rally

Inisyuhan ng show cause order ng Land Transportation Franchising and Regulatory Board ang mga operator ng mga pampublikong sasakyan na sa halip na bumiyahe ay nakita na nasa rally sites sa Quezon City.

Ayon sa LTFRB, tatlumpu’t apat na PUVs kabilang ang mga bus at UV Express ang nakita sa rally sites.

Ipinaliwanag ng LTFRB na bagaman inirerespeto nito ang Kalayaan ng bawat isa na magprotesta at maglahad ng saloobin, hindi naman dapat maipagsawalang bahala ang interest ng publiko.

Sinabi ng ahensya na dahil sa hindi pagbiyahe ng 34 na PUVs ay naapektuhan ang mga commuter dahil nabawasan ang bilang ng available na public transportation.

Inatasan ng LTFRB ang mga operator na magpaliwanag kung bakit hindi dapat isuspinde ang kanilang permit to operate.

Pinadadalo din sila sa pagdinig na itinakda sa July 9. (DDC)