OFW Lounge sa Mactan-Cebu International Airport, binuksan
Mas magaan, mas komportable, at mas maayos na ang biyahe ng ating mga Kababayang Overseas Filipino Workers (OFWs) mula sa Cebu at iba pang bahagi ng Visayas sa pagbubukas ng OFW Lounge sa Mactan-Cebu International Airport (MCIA).
Ito na ikatlong bagong international OFW Lounge na pinamamahalaan ng Overseas Workers Welfare Administration (OWWA) sa ilalim ng programang Alagang OWWA, kasunod ng mga lounge sa NAIA Terminal 1 at NAIA Terminal 3.
Itinatag ito sa pakikipagtulungan ng OWWA at Aboitiz InfraCapital Cebu Airport Corporation (ACAC) kasama Department of Migrant Workers (DMW), upang magbigay ng mas maayos at mas accessible na serbisyo para sa ating mga OFWs.
May seating capacity na 80 ang OFW Lounge at nag-aalok ito ng libreng pagkain at inumin, komportableng resting areas, libreng Wi-Fi, charging stations, at assistance desks para sa iba’t ibang OFW-related concerns.
Available rin sa lounge ang mga frontline services ng OWWA tulad ng membership registration at renewal, OWWA E-Card issuance, at iba pang welfare at social protection services upang maging mas mabilis at mas madali ang pag-access ng mga OFW sa kanilang mga benepisyo.
Kasabay ng pagbubukas ng OFW Lounge, inilunsad din ng OWWA at SSP Mactan Cebu ang kanilang partnership na nagbibigay ng eksklusibong dining at retail discounts para sa mga OWWA E-Card holders sa mga partner establishments sa loob ng Mactan-Cebu International Airport. Kabilang sa mga unang partner establishments ang Burger King, Ritazza, Asian Kitchen, Nippon Ramen, The Coffee Bean & Tea Leaf, BonChon, at Cabin Kitchen + Bar. Bahagi ito ng patuloy na pagpapalawak ng mga benepisyo para sa mga OWWA members at pagkilala sa mahalagang ambag ng ating mga OFW sa bansa.
Kasabay rin ng pagbubukas ng OFW Lounge ang pagbubukas ng DMW OFW Facilitation Center sa loob ng MCIA upang magbigay ng agarang assistance sa mga OFW, partikular sa mga usapin kaugnay ng Overseas Employment Certificate (OEC) at iba pang travel documents.
Ayon kay OWWA Administrator Patricia Yvonne “PY” Caunan, ang bagong OFW Lounge ay bahagi ng patuloy na pagpapalawak ng social protection services ng pamahalaan para sa mga OFW.
“We believe our OFWs deserve a lounge of their own in one of the country’s finest international airports here in Cebu. It is a simple but meaningful way of honoring their sacrifices and recognizing their invaluable contributions to our nation. Through this OFW Lounge, we are bringing OWWA and DMW services closer to our migrant workers, ensuring they receive the care, protection, and support they deserve at every stage of their migration journey. We also extend our sincere gratitude to Aboitiz InfraCapital Cebu Airport Corporation and SSP Mactan Cebu for sharing our commitment to the welfare of our OFWs. This partnership shows what is possible when government and the private sector work together to give back to the modern-day heroes who continue to build our nation,” ani OWWA Administrator Patricia Yvonne “PY” Caunan.
Ang pagbubukas ng OFW Lounge sa Mactan-Cebu International Airport ay bahagi ng pagtupad sa pangako ni Pangulong Ferdinand R. Marcos Jr. na magtatag ng mas maraming OFW airport lounges at iba pang pasilidad na magpapalakas sa social protection para sa ating mga makabagong bayani. Kasunod ng mga lounge sa NAIA Terminal 1, NAIA Terminal 3, at ngayon sa MCIA, patuloy na pinalalawak ng OWWA ang access ng mga OFW sa mga serbisyong tunay na may malasakit at may puso. (Bhelle Gamboa)
