Pulis na may-ari ng baril na ginamit sa shooting incident sa Tacloban iimbestigahan ng NAPOLCOM

Magkakasa ng parallel investigation ang National Police Commission laban sa pulis na may-ari ng armas na ginamit ng isang menor de edad sa shooting incident sa paaralan sa Tacloban City.

Ayon kay Napolcom Commissioner Ralph Calinisan, ito ay para tukuyin ang posibleng administrative liability ng nasabing pulis.

Inatasan na ni Calinisan si Napolcom Region 8 Director Risty Sibay na ikasa ang imbestigasyon sa pakikipag-ugnayan sa PNP.

Ani Calinisan, maraming kailangang ipaliwanag ang pulis na tiyahin ng isa sa mga sangkot na menor de edad.

Nangyari aniya ang trahedya dahil sa kapabayaan ng pulis.

Depende sa magiging resulta ng imbestigasyon, ang pulis ay maaaring maharap sa grave misconduct o grave neglect charges na may parusang suspension, demotion o dismissal sa serbisyo. (DDC)