Pagmamarka ng common exhibits pinalagan ng kampo ni VP Sara

Posibleng tumagal pa ng ilang araw ang pre-trial conference sa impeachment laban kay Vice President Sara Duterte dahil sa napakarami pang dokumento ang kailangang markahan.

Ayon kay House lead prosecutor Rep. Gerville Luistro, hiniling nila sana na payagan ang isahang pagmamarka ng common exhibits pero hindi ito pinayagan ng depensa.

Dahil dito, mananatili ang separate marking sa mga ebidensya at dokumento ng prosekusyon at depensa.

Samantala, ayon kay Atty. Michael Poa, hindi nila pinayagan ang hirit na ito ng prosekusyon dahil para sa kanila dapat itratong magkahiwalay ang exhibits ng magkabilang panig.

Ani Poa, kahit pareho ang records at mga dokumento nais nilang mamarkahan ito ng magkahiwalay.

Ngayon ang ikatlong araw ng Pre-Trial Conference.

Sa pagtaya ni Poa, posibleng hindi pa rin matapos ang proseso hanggang bukas at maaaring abutin pa ng Huwebes. (DDC)