DOH nagpaalala sa publiko sa mga usong sakit kapag tag-ulan

Kasunod ng pormal na deklarasyon ng PAGASA na panahon na ng tag-ulan sa bansa, pinag-iingat ng Department of Health ang publiko sa mga sakit na kadalasang tumataas ang kaso kapag ganitong panahon.

Ayon DOH Usec. Albert Domingo, dapat maging alerto ang publiko laban sa mga sakit na WILD o Waterborne Diseases, Influenza-like Illnesses, Leptospirosis, at Dengue.

Ani Domingo, kapag ganitong madalas na ang pag-ulan, tumataas ang tsansa ng kontaminasyon sa tubig at ang pagdami ng lamok na maaaring may dalang sakit na Dengue.

Hinikayat din ni Domingo ang mga magulang na palakasin ang resistensya ng mga bata lalo ngayong malapit na ang pasukan sa pamamagitan ng tamang pagkain at ehersisyo upang hindi sila agad madapuan ng Influenza-like Illnesses.

Maliban dito ay nagpaalala din ang DOH sa sakit na Leptospirosis sa tubig-baha na kontaminado ng ihi ng daga. (DDC)